اضطراب الشخصية الشخصية الحدية

هبه شفيق
ماجستير علم النفس الاكلينيكي
 معالجة نفسية معتمدة من وزارة الصحة

انتي من الاشخاص اللي دايما بيحسو بالفراغ الرهيب من جواهم ودايما حاسين بالملل وانهم فاضيين ومبينجزوش حاجة رغم انك ممكن تكوني ناجحة جدا.. 

طب مزاجك متقلب بطريقة سريعة، ساعات بتكوني فرحانة ومبسوطة وساعات بتكوني غضبانة وعنيفة بقوة حتى مع اقرب الناس ليكي.
بتقربي من ناس قوي وبتحبيهم من قلبك واوقات بتبعدي عنهم وتقلبي عليهم والاغرب انك متقدريش تستغني عنهم، ودايما عندك خوف ورعب ان الناس اللى بتحبيهم يسيبوكي.

غضوبة جدا لأبعد مدي لدرجة انك ممكن تكسري اي حاجة قدامك.  
مندفعة لدرجة انك ممكن تعملي سلوكيات انتي مش راضية عنها زي انك تاكلي كتير او تصرفي فلوسك في اي حاجة او تشربي سجاير اوتجربي مخدرات او بتسوقي بتهور او تدخلي في علاقة غير مناسبة ليكي ولمستواكي. 

اوقات بتحسي بتمرد علي كل حاجة حواليكي وعندك رفض للواقع. وكتير بتغيري اهدافك او معتقداتك. 
كتير بتسالي نفسك انا مين؟ وعايزة ايه؟ وبتجلدي وتلومي نفسك علي طول..  وساعات كتير مبتحبيش نفسك.

لما بتضغطي وتحزني بتجيلك افكار انك تنتحري وتخلصي من الالم والوجع ده لدرجة انك ممكن تجرحي اوتأذي نفسك أو انك تعملي كده فعلا .

لو تواجدت أغلب الاعراض دي معناها انك بتعاني من اضطراب الشخصية الحدية Borderline personality disorder  وده اضطراب بينتشر بين الاناث اكتر من الرجال وبقي منتشر بصورة كبيرة الفترة الاخيرة. 
متتردديش في طلب المساعدة لانه محتاج علاج مكثف.